Merkato e Armando Brojës është kthyer në një lajm që ndryshon në çdo moment. Pas njoftimeve të ekspertëve të futbollit se sulmuesi kuq e zi do të qëndronte te Chelsea deri në janar, ku do të nënshtrohej rehabilitimit për dëmtimin në tendinë, rrjedha ka ndryshuar sërish.

Ekipi i Ipswich është rikthyer në negociatat për të marrë shërbimet e 22-vjeçarit, i cili një javë më parë realizoi dhe testet mjekësore në të. Palët nuk kanë dhënë detaje për shifrat apo kushtet që do të ofrojnë, por në marrëveshjen e pak ditëve më parë Broja do të jepej për huazim me një vit e më tej me të drejtën e shitjes së kartonit për 30 milionë euro nëse Ipswich do të qëndronte në kategori.

Edhe Everton kishte shprehur interes për Brojën në atë kohë, por nuk kishte bërë një ofertë konkrete. Rinisjen e negociatave e ka konfirmuar menaxheri i Ipswich, Kieran McKenna, i cili ka theksuar se shpresojnë të arrijnë në një marrëveshje që do të jetë e favorshme për të dy palët.

Ky do të ishte huazimi i katërt i Brojës larg Chelsea, pas periudhave të kaluara në Vitesse, Southampton dhe Fulham. Kontrata e tij me Chelsea është në fuqi deri në vitin 2028.

Problemet për Brojën filluan në dhjetor të vitit 2022, kur ai pësoi një dëmtim të ligamenteve që e mbajti jashtë fushës së blertë deri në shtator të vitit të shkuar. Një huazim në Ipswich mund t’i ofrojë mundësinë të rikthehet në formën e tij të plotë dhe të tregojë potencialin e tij në kampionatin anglez.