Aktori Armie Hammer po bën një rikthim në industrinë e filmit pas një periudhe të vështirë në karrierë, e cila u ndërpre për shkak të akuzave për sjellje të pahijshme dhe mesazhe të dyshuara me përmbajtje kanibalistike. Sipas Variety, Hammer ka marrë rolin kryesor në filmin “The Dark Knight”, i cili do të drejtohet nga regjisori gjerman Uwe Boll. Xhirimet pritet të fillojnë më 27 janar në Kroaci.
Ky projekt shënon hapin e parë të madh për Hammer pas skandaleve që shpërthyen në vitin 2021. Përveç “The Dark Knight”, aktori do të luajë edhe në një tjetër film vestern të titulluar “Frontier Crucible”, me regji të Travis Mills.
Pas një hetimi të gjatë, prokurorët në Los Angeles, në vitin 2023, vendosën të mos ngrinin akuza kundër aktorit, duke deklaruar se nuk kishte prova të mjaftueshme për të mbështetur akuzat.
Armie Hammer, i njohur për rolet e tij në filma të suksesshëm si “Call Me by Your Name”, “The Lone Ranger” dhe “The Man from UNCLE”, në një intervistë të fundit foli hapur për periudhën e vështirë që kaloi. Ai rrëfeu se kishte arritur një pikë të errët në jetën e tij ku kishte menduar për vetëvrasje, por kishte zgjedhur të luftonte për hir të fëmijëve të tij.
Rikthimi i Hammer në ekranin e madh shihet si një përpjekje për të rindërtuar karrierën dhe imazhin e tij publik pas një periudhe të ngarkuar me polemika dhe vëmendje mediatike.
