Dy shtetas shqiptarë, 37 dhe 33 vjeç, janë arrestuar nga karabinierët në Bergamo, pasi u kapën në flagrancë duke çmontuar automjete të markave luksoze të parkuara në rrugë.

Sipas autoriteteve, dy të dyshuarit vepronin gjatë natës, duke përzgjedhur me kujdes automjetet që shënjestronin. Ata akuzohen për çmontim dhe vjedhje pjesësh nga makina në Bergamo dhe në disa zona të provincës.

Nga rindërtimi paraprak i ngjarjes rezulton se fillimisht ata kanë vjedhur një Fiat 500L të parkuar në qytet, të cilin e përdorën për të lëvizur drejt Treviolos. Atje, sipas hetimeve, çmontuan timonin, parakolpin, kapakun e motorit dhe dritat e përparme të një Mercedes-Benz GLC.

Më pas, dyshohet se janë zhvendosur në Curno, ku kanë marrë pjesë të ngjashme nga një Audi Q8, si dhe dy sedilje fëmijësh.

Të dy personat, të cilët rezultojnë të njohur për forcat e rendit, u dërguan në burg dhe u akuzuan menjëherë për tre episode grabitjeje.

Automjeti i vjedhur dhe sendet e tjera të marra nga makinat luksoze u sekuestruan nga karabinierët dhe iu kthyen pronarëve përkatës. Hetimet vijojnë për të verifikuar nëse dyshja mund të jetë e përfshirë edhe në raste të tjera të ngjashme në zonë.