Policia ka arrestuar dy persona në lidhje me vrasjen e Gentian Bejtjas në Larushk të Fushë Krujës, pesë ditë pas ngjarjes. Njëri prej tyre është 30-vjeçari Edison Haxhiu, ndërsa tjetri është një 41-vjeçar i njohur si Ilir Beqaraj, me tre emra të tjera si Brahimi dhe Mançellari. Dy të arrestuarit janë të dënuar më parë për vepra të tjera të lehta penale.

Ilir Beqaraj dhe Edison Haxhiu dyshohet të jenë pjesë e një grupi kriminal aktiv në Fushë Krujë dhe zonën rreth e rrotull. Beqaraj është kushëri i Ylli Brahimit, krahut të djathtë të Ervis Martinajt. Autorët, sipas skemës së zbardhur nga Policia e Tiranës, u futën në oborrin e shtëpisë së Bejtjas me një Land Rover me targa të vjedhura. Pasi e vranë, ata u larguan me mjetin tip ‘Land Rover’ dhe më pas me një ‘Golf’ në drejtim të fshatit Bubq në Krujë.

Pas hetimeve, policia ka arritur të zbulojë lëvizjen e autorëve me ‘Golfin’ në kamerat e sigurisë dhe ka arrestuar Haxhiun në një lavazh në afërsi të zonës së Lundrës. Gjatë kontrollit në banesën e Beqaraj janë gjetur një armë zjarri, fishekë, radiomarrëse, si dhe mjete identifikimi të falsifikuara. Beqaraj është akuzuar për mbajtjen pa leje dhe prodhimin e armëve, armëve shpërthyese dhe municionit, si dhe për falsifikimin e dokumenteve, si një prej autorëve të vrasjes së Bejtjas. Ndërsa Haxhiu është akuzuar për sigurimin e kushteve dhe mjeteve materiale për të kryer vrasje.

Policia ka arritur të zbardhë lëvizjen e autorëve pasi kanë djegur makinën e krimit, duke identifikuar Beqarajn si një prej ekzekutorëve dhe Haxhiun për përdorimin e mjetit për largim nga vendi i ngjarjes.