Policia e Tiranës ka vënë në pranga një 20-vjeçar, i cili dilte në rrugë duke u prezantuar si efektiv policie dhe përdorte padrejtësisht uniformën e Policisë së Shtetit.

Sipas njoftimit zyrtar, bëhet fjalë për E. B., banues në Kamëz, i cili gjatë një kontrolli në bulevardin “Nënë Tereza” u kap në automjetin e tij tip “Mercedes-Benz” i veshur me uniformë dhe stema të ngjashme me ato të Policisë. Verifikimet konfirmuan se ai nuk ishte punonjës policie.

Gjatë kontrollit në banesën e tij, efektivët sekuestruan:
• 1 armë sportive e llojit pistoletë me dy krehra
• 4 dokumente identifikimi me emra dhe foto të dyshuara të falsifikuara
• 1 uniformë policie, 16 stema dhe grada policore
• 3 kapele me shenja të ngjashme me uniformën e Policisë

Policia njofton se po vijon puna hetimore për dokumentimin e plotë të rastit dhe për verifikimin nëse 20-vjeçari mund të ketë qenë i përfshirë në veprimtari të tjera të paligjshme që lidhen me përdorimin e pajisjeve dhe uniformave policore për përfitime.

Në përfundim të veprimeve të para, E. B. u arrestua në flagrancë dhe materialet procedurale iu referuan Prokurorisë për veprime të mëtejshme.

Ky rast vjen në kuadër të kontrolleve të patrullës së Komisariatit Nr. 5 për goditjen e paligjshmërisë në çdo fushë që shfaqet.