Policia e Tiranës ka arrestuar një 26-vjeçar, Shkëlqim Saraçi, i cili tentoi t’i merrte një biznesmeni 20 mijë euro, duke u prezantuar si zyrtar i lartë. Operacioni, i koduar “Apps”, përfundoi me sukses, duke u zhvilluar nën drejtimin e Prokurorisë së Tiranës dhe duke bashkëpunuar me Sektorin për Hetimin e Krimit Ekonomik dhe Financiar.
Gjatë arrestimit, policia sekuestroi 20 mijë euro, tre celularë dhe një automjet. Saraçi u kap në flagrancë në momentin kur po merrte paratë nga administratori i një subjekti privat, pas mashtrimeve në aplikacione të ndryshme.
Në kuadër të hetimeve, është identifikuar dhe shpallur në kërkim organizatori i dyshuar i këtij rasti, shtetasi L. D., i cili aktualisht dyshohet se është jashtë vendit. Autoritetet po punojnë për lokalizimin dhe kapjen e tij, si dhe për identifikimin e personave të tjerë të përfshirë në këtë aktivitet të paligjshëm.
Materialet procedurale do t’i kalohen Prokurorisë për veprime të mëtejshme në lidhje me akuzat për “Mashtrimin” me pasoja të rënda dhe “Përvetësimi i titullit apo detyrës shtetërore”.
