Një operacion i autoriteteve italiane ka përfunduar me sekuestrimin e një sasie të konsiderueshme lënde narkotike dhe arrestimin e dy personave të dyshuar për trafik droge, mes tyre një shtetas shqiptar dhe një pakistanez.

Sipas mediave italiane, karabinierët në Forlì kishin vëzhguar prej kohësh një 31-vjeçar pakistanez për lëvizje dhe kontakte të dyshimta në trafikun e drogës. Hetimet çuan në identifikimin e një 50-vjeçari shqiptar, i njohur për aktivitet të mëparshëm kriminal përgjatë aksit Forlì–Ravenna.

Operacioni final u zhvillua pranë daljes së autostradës në Orte, në provincën e Viterbos, ku dy të dyshuarit u ndaluan në rrugën E45 drejt Romagna-s.

Gjatë kontrollit të automjetit, autoritetet sekuestruan:
• Rreth 2.5 kilogramë kokainë të pastër, me vlerë disa qindra mijë euro,
• 4 mijë euro cash, të dyshuara si të ardhura nga aktiviteti kriminal.

Hetuesit bëjnë me dije se dy të arrestuarit dyshohet të menaxhonin një rrjet shpërndarjeje droge mes zonave të Forlì dhe Ravenna, ndërsa hetimet për identifikimin e bashkëpunëtorëve të tjerë vazhdojnë.