Nazif Muslija, 50-vjeçari shqiptar nga Maqedonia e Veriut, i akuzuar për vrasjen e bashkëshortes së tij, Sadjide Muslija, është vënë në pranga nga autoritetet italiane. Ai u kap në një zonë të braktisur pranë Matelica (Macerata), i shtrirë përtokë dhe në gjendje të rëndë fizike.

Karabinierët kanë konfirmuar se Muslija ka pësuar plagë të rënda, duke ngritur dyshimet se ka tentuar t’i japë fund jetës. Rreth orës 16:30, një gjuetar që po kalonte pranë zonës e pa të gjakosur dhe i dha ndihmën e parë, përpara se të sinjalizonte autoritetet. Ambulanca mbërriti menjëherë dhe e transportoi 50-vjeçarin në spital.

Automjeti i tij, një Smart i bardhë, i shpallur në kërkim pas ngjarjes, u gjet i braktisur jo larg vendit ku ai u zbulua.

Ngjarja e rëndë ndodhi më 3 dhjetor në Pianello Vallesina di Monte Roberto (Ancona), ku gruaja u gjet e pajetë në shtratin e saj, me plagë të rënda në kokë dhe gjoks. Hetuesit kanë sekuestruar edhe një tub hekuri, i cili dyshohet se është arma e krimit, pasi në të janë gjetur gjurmë gjaku. Analizat laboratorike pritet të përcaktojnë saktësisht rolin e tij në ngjarje.

Autoritetet italiane po vijojnë hetimet për të zbardhur plotësisht motivin dhe dinamikën e krimit makabër.