Policia e Durrësit ka vënë në pranga 39-vjeçarin Fation Janina, i cili dyshohet se vrau me thikë dhe çekiç fqinjin e tij, 82-vjeçarin Paulin Gina, mbrëmjen e së hënës në lagjen nr. 16 të qytetit.

Sipas burimeve zyrtare, pas kryerjes së krimit, autori ka mbyllur viktimën në banesë dhe është larguar. Gjatë kontrollit në shtëpinë e tij, policia ka gjetur dhe sekuestruar dy thika, një çekiç dhe veshje me njolla gjaku, të cilat janë dërguar në Institutin e Policisë Shkencore për ekzaminime të mëtejshme.

Operacioni për kapjen e autorit u finalizua falë kontrolleve të shumta dhe ndërmjetësimit me vëllain e tij, i cili ndihmoi në dorëzimin e të dyshuarit.

Fation Janina akuzohet për veprat penale “Vrasja me dashje” dhe “Mbajtja pa leje e armëve të ftohta”. Hetimet vijojnë në bashkëpunim me Prokurorinë për të zbardhur motivet dhe rrethanat e plota të kësaj ngjarjeje të rëndë.

Materialet procedurale i janë referuar Prokurorisë për veprime të mëtejshme ligjore.