Specialistët e Seksionit për Hetimin e Krimeve të Rënda, në bashkëpunim me shërbimet e Komisariatit Nr. 1, ekzekutuan urdhrin e Prokurorit për ndalimin e Besard Pashkaj, 26 vjeç, i shpallur në kërkim dhe ndaj të cilit Gjykata ka caktuar masën e sigurisë për veprat penale “Vrasja në rrethana të tjera cilësuese”, e mbetur në tentativë, kryer në bashkëpunim, dhe “Mbajtja pa leje e armëve dhe municionit”.

Ky arrestim lidhet me ngjarjen e korrikut të pesë viteve më parë, kur dy persona mbetën të plagosur pas një konflikti që nisi për një makinë të gërvishtur në kryeqytet. Policia ka identifikuar si autor të dyshuar Aldo Iamandi Gjinin, 31 vjeç, i cili rezulton të jetë shpallur në kërkim ndërkombëtar për tentativë vrasjeje në Luksemburg në nëntor të vitit të kaluar.

Ngjarja ndodhi në ambientet e një lokali në Rrugën “Todi Shkurti”, ku nga të shtënat mbetën të plagosur Altin Gjoka, 32 vjeç, dhe Jetmir Marashi, 28 vjeç. Gjoka u plagos në shpatull, ndërsa Marashi mori plagë në gjoks dhe iu nënshtrua një ndërhyrjeje kirurgjikale në spitalin e Traumës.

Policia ka sekuestruar pamjet e kamerave të sigurisë në zonë dhe ka shoqëruar disa persona për marrje në pyetje. Kërkimet për kapjen e autorit të dyshuar, Aldo Gjinin, vijojnë.