Bashkim Osmani, bosi i dyshuar i një bande mafioze, të shënjestruar nga operacioni masiv i policisë të martën kundër pastrimit të parave, pritet të ekstradohet në Majorca nga Kroacia javën e ardhshme.

Mediat spanjolle bëjnë me dije se Osmani u arrestua në hotelin e tij “BO Palazzo” në Porec në kuadër të operacionit policor, i cili u krye njëkohësisht në vende të ndryshme.

Shqiptari nga Kosova, ishte në hotelin e tij në Kroacinë veriore në momentin që u arrestua. Hetuesit nga Guardia Civile dhe Policia Kombëtare shkuan në Kroaci për të bashkëpunuar për arrestimin, pasi ekzistonte frika se operacioni i tyre mund të dështonte për shkak të rrjedhjes së informacionit.

Osmani thuhet se ka kontakte në të gjithë Kroacinë dhe ka nën kontroll një ish-shef të shërbimit sekret kroat si dhe agjentë aktualë.

Ai nuk bëri rezistencë ndaj arrestimit dhe sugjerohet se kishte parashikuar që avokatët e tij ta lironin. Megjithatë, ai po mbahet në një burg të sigurisë maksimale, në pritje të transferimit në Majorka. Hetuesit thonë se është vendimtare që ai të sillet në Majorka.