Kryeredaktori i njërës prej revistave më të njohura satirike në Turqi, Aslan Ozdemir, është arrestuar në aeroportin e Stambollit pas kthimit të tij nga Franca, për shkak të publikimit të karikaturave që përfshijnë figurat fetare të profetëve Muhamed dhe Musa.

Sipas autoriteteve turke, Ozdemir është ndaluar menjëherë pas mbërritjes dhe është shoqëruar drejt Gjykatës së Stambollit, ku ndaj tij është ngritur një çështje penale për “nxitje të urrejtjes ose armiqësisë dhe për nxitje të urrejtjes etnike”, bazuar në përmbajtjen e revistës së tij.

Gjykata vendosi masë sigurie “arrest me burg”, duke argumentuar se përmbajtja e publikuar ka cenuar ndjeshmëri të larta fetare dhe shoqërore, duke krijuar potencial për tensione të mëtejshme.

Rasti ka shkaktuar reagime të përziera në opinionin publik turk dhe ndërkombëtar – me mbështetësit e lirisë së shtypit që e quajnë këtë një goditje ndaj fjalës së lirë dhe kundërshtarët që e shohin si një provokim të pajustifikuar ndaj simboleve të shenjta fetare.

Revista “Leman” është e njohur për stilin e saj kritik, satirik dhe shpeshherë provokues ndaj çështjeve politike dhe sociale. Megjithatë, karikaturat që prekin çështje fetare kanë qenë gjithmonë një terren i ndjeshëm në Turqi, ku feja dhe liria e shprehjes përplasen shpesh në kufijtë ligjorë dhe etikë.