Autoritetet greke kanë vënë në pranga një 48-vjeçar nga Tepelena, i shpallur në kërkim ndërkombëtar prej pothuajse dy dekadash. Arrestimi u krye në aeroportin “Eleftheros Venizelos” të Athinës, ku policia ndaloi Ardian Gërbin, nga fshati Bënçë, i dënuar në Shqipëri me 7 vite e 4 muaj burg për trafik narkotikësh.
Sipas mediave greke, përfshirë Skai.gr, Gërbi rezulton se në vitin 2008 i kishte shitur një personi rreth 3 kilogramë marijuanë dhe 290 gramë kokainë, ngjarje pas së cilës ai u largua duke iu shmangur drejtësisë shqiptare.
Pas identifikimit dhe arrestimit në aeroport, autoritetet greke kanë nisur procedurat ligjore për ekstradimin e tij drejt Shqipërisë, ku pritet të vuajë dënimin e mbetur.
