Ish-deputeti Dashamir Tahiri ka deklaruar se Shoqata “Çamëria” po kalon një proces të plotë ringritjeje dhe rithemelimi, pas, sipas tij, një periudhe dobësimi të theksuar të strukturave të saj.

Në një intervistë për News 24, Tahiri akuzoi kreun e PDIU-së, Shpëtim Idrizi, si përgjegjësin kryesor për shkatërrimin e organizimit të shoqatës. Ai u shpreh se komuniteti çam e ka “larguar nga puna” Idrizin përmes votës.

“Ata që e shkatërruan, ju e dini, Shpëtim Idrizi. Çamët e kanë pushuar nga puna, nuk mori as 2 mijë vota në zgjedhjet që kaluan,” tha Tahiri, duke nënvizuar se Shoqata “Çamëria” ka nisur procesin e ringritjes nga e para.

Sipas tij, komuniteti çam është mobilizuar për të rikthyer shoqatën në funksion të plotë:

“Ka qenë jo ekzistente, ka filluar rithemelimi, ringritja, gjithçka nga e para,” deklaroi ai.

Tahiri theksoi gjithashtu se komuniteti çam historikisht nuk është vënë nën kontroll nga asnjë figurë politike, duke shtuar:

“Çamët nuk i mori dot peng Enver Hoxha, jo më Shpëtimi. Çamët do ringrihen në të gjitha rrethet dhe do bëhen edhe më të fortë seç ishin.”

Procesi i ringritjes së Shoqatës “Çamëria” pritet të vijojë me riorganizimin e strukturave në të gjitha zonat ku komuniteti çam është i pranishëm.