Policia e Tiranës ka konfirmuar arrestimin në Greqi të Ardian Ahmetajt, një shtetas shqiptar me rrezikshmëri të lartë shoqërore, i shpallur në kërkim ndërkombëtar për vrasje me dashje dhe pjesëmarrje në grup të strukturuar kriminal.

Ahmetaj është ndaluar në qytetin Pire, si rezultat i një bashkëpunimi të ngushtë mes Interpol Tiranës dhe autoriteteve greke, pas një informacioni të siguruar nga strukturat e Policisë së Shtetit lidhur me vendndodhjen e tij.

Sipas njoftimit zyrtar, ai ishte shpallur në kërkim nga Gjykata e Fierit, pasi në vitin 2019, në qytetin e Lushnjes, në bashkëpunim me Laert Haxhiun dhe Orges Bilbilin, dy emra të njohur për drejtësinë shqiptare, ka qenë i përfshirë në vrasjen me armë zjarri të shtetasit Besnik Hida.

Autoritetet shqiptare kanë nisur menjëherë procedurat e ekstradimit të tij drejt Shqipërisë, ku do të përballet me drejtësinë për veprat penale të rënda për të cilat akuzohet.