Një shqiptar 36-vjeçar, banues në qytetin e Salarios, ka rënë në prangat e policisë italiane nën akuzën e përfshirjes në veprimtari të paligjshme me lëndë narkotike.

Sipas mediave italiane, i riu u ndalua për kontroll teksa po lëvizte me automjetin e tij në qytet. Gjatë ndalimit, ai dyshohet se u mbyll brenda makinës, duke refuzuar të zbresë, çka shtoi dyshimet e efektivëve.

Pas ndërhyrjes së policisë, drejtuesi u detyrua të dalë nga automjeti dhe iu nënshtrua kontrollit. Gjatë verifikimeve, oficerët zbuluan se telefoni i tij ishte fshirë nga kontaktet dhe regjistri i thirrjeve, në një përpjekje të dyshuar për të penguar hetimet.

Nga kontrolli fizik dhe i mjetit, policia gjeti 50 gramë kokainë, të fshehura brenda kapuçit të një xhakete. Më pas, u ushtrua kontroll edhe në banesën e 36-vjeçarit, ku nuk u gjetën sasi të tjera droge.

Në përfundim të veprimeve procedurale, shqiptari u arrestua, ndërsa lënda narkotike, telefoni celular dhe sende të tjera u sekuestruan. Hetimet vijojnë për të zbuluar nëse ai ishte pjesë e një rrjeti më të gjerë të shpërndarjes së drogës.