Policia e Kavajës ka vënë në pranga 28-vjeçarin Murat Curri, alias Murat Cërriku, pas një ngjarjeje të rrezikshme në një bar-kafe në lagjen nr. 2 të qytetit.

Sipas njoftimit zyrtar, Curri u fut në lokal i armatosur, kanosi klientët dhe goditi me qytën e pistoletës pronarin 64-vjeçar, S.V., duke i shkaktuar dëmtime të lehta. Pas ngjarjes, ai u largua me shpejtësi me automjet, duke dëmtuar dy makina të tjera në rrugë.

Shërbimet operative të DVP Durrës dhe Komisariatit të Kavajës e lokalizuan dhe kapën pas disa orësh ndjekjeje, ndërsa gjatë tentativës për t’u larguar, Curri hodhi armën e zjarrit, e cila u sekuestrua. Kontrolli në automjetin e përdorur zbuloi edhe një krehër me municion luftarak.

Burimet policore bëjnë me dije se Curri ka precedentë penalë në fushën e narkotikëve dhe armëmbajtjes pa leje. Hetimet nën drejtimin e Prokurorisë vijojnë për dokumentimin e plotë ligjor të ngjarjes.