Dega e Partisë Demokratike në Elbasan zhvillon këtë të dielë procesin për zgjedhjen e drejtuesit të ri, me pesë kandidatë në garë: Lumturi Hasa, Durim Cekrezi, Elior Vila, Sokol Shkëlzeni dhe Alis Narazani.

Megjithatë, atmosfera është tensionuar pasi disa anëtarë kanë denoncuar se emrat e tyre janë hequr nga listat e anëtarësisë pa njoftim. Ndër ta është edhe Doris Madhi, drejtuese e grupit të këshilltarëve të opozitës në Këshillin Bashkiak të Elbasanit.

Burimet bëjnë me dije se lista ka përjashtuar edhe Rudina Allën, kryetare e forumit të Gruas, Zheni Gjergjin, e emëruar drejtoreshë në Spitalin e Elbasanit, si dhe Alesia Balliun, e cila kishte shprehur publikisht ambicien për të kandiduar për kreun e PD-së përballë Sali Berishës.

Ky fenomen vjen pas një serie përjashtimesh të ngjashme, përfshirë këshilltarët e PD në Durrës, të përjashtuar për mbështetjen ndaj lëvizjes së Ervin Salianjit, duke reflektuar tensionet e brendshme në strukturat e partisë.