Një 31-vjeçar shqiptar ka rënë në prangat e policisë italiane ditën e sotme në qytetin e Pisës, pas një operacioni të shpejtë që çoi në sekuestrimin e rreth 5.9 kilogramëve kokainë.

Sipas mediave italiane, i riu u bë subjekt i dyshimeve të forcave të rendit pas sjelljes së tij nervoze gjatë një ndalese rutinë. Ai nuk arriti të justifikojë itinerarin e lëvizjeve të tij, çka çoi në kontrollin e mëtejshëm nga ana e policisë.

Hetuesit e Policisë së Pisës ndërmorën menjëherë bastisjen e banesës së tij në Cascina, ku u zbuluan 6 blloqe kokaine, një sasi prej 6,800 eurosh cash, si dhe mjete për prerjen dhe paketimin e lëndës narkotike – elementë që konfirmojnë dyshimet për aktivitet të mirëorganizuar të trafikut dhe shpërndarjes së drogës.

31-vjeçari u arrestua për posedim të lëndëve narkotike me qëllim shpërndarje dhe aktualisht ndodhet në paraburgim në pritje të procedurave gjyqësore që do të ndiqen nga Prokuroria Publike pranë Gjykatës së Pizës.

Policia italiane ka theksuar se operacione të tilla mbeten pjesë e një strategjie të përforcuar kundër rrjeteve të trafikut të drogës që përfshijnë elementë të huaj, ndër ta edhe shtetas shqiptarë. Hetimet për të zbuluar rrjetin e mundshëm të bashkëpunëtorëve vijojnë.