Një i ri shqiptar është arrestuar në qytetin Cesena, Itali, pasi u kap me kokainë dhe një shumë parash cash. Arrestimi i 27-vjeçarit u krye më 8 janar nga karabinierët, të cilët e kishin vënë atë prej kohësh nën vëzhgim.

Hetuesit konstatuan se i riu qëndronte në Cesena vetëm për periudha të shkurtra kohore, duke marrë gjithmonë makina me qira dhe duke mos pasur një aktivitet të qartë pune që të justifikonte praninë e tij në zonë.

Pasi hynë në dhomën e hotelit ku po qëndronte shqiptari, policët gjetën rreth 200 gramë kokainë të ndarë në doza të vogla, e vendosur mbi një komodinë. Gjithashtu, u sekuestrua një shumë prej 470 eurosh cash, që sipas policisë lidhet me trafikun e drogës.

I riu u arrestua menjëherë dhe u dërgua në burg në Forli, ndërsa gjykata vendosi masën e sigurisë “arrest me burg”. Operacioni nxori në pah se aktiviteti i tij kishte qëllim shpërndarjen e drogës në këtë zonë të Italisë. Hetimet për rrjetin e mundshëm të bashkëpunëtorëve vijojnë.