Policia e Kosovës ka ndaluar një person të dyshuar për kanosje ndaj Kryeministrit Albin Kurti, pas postimeve kërcënuese në rrjetin social “Instagram”. Sektori për Hetimin e Krimeve të Rënda i Policisë së Kosovës njoftoi se më 7 janar 2025 ishte iniciuar një rast për veprën penale “kanosje” ndaj Kurtit dhe postimeve kërcënuese të lidhura me dhunë nga grupi “Brigada Sever”.
Policia ka identifikuar dhe arrestuar të dyshuarin, M. R., një mashkull kosovar lindur në vitin 2004, më 10 janar 2025 në Zveçan. Gjatë ndalimit, është realizuar një kontroll në shtëpinë e tij, ku është gjetur dhe sekuestruar një armë gjuetie pa leje. Prokuroria Themelore e Mitrovicës ka caktuar një masë ndalimi prej 48 orësh për të dyshuarin.
Zëvendësdrejtori i Policisë për rajonin e veriut, Veton Elshani, konfirmoi arrestimin dhe e quajti këtë veprim si përgjigje ndaj kanosjes ndaj Kryeministrit.
