Gjykata e Lezhës ka caktuar masën e sigurisë arrest në burg për efektivin e policisë Besart Kovaçi, i përfshirë në përplasjen me armë mbrëmjen e 1 shkurtit në berberhanen e fshatit Rrilë, Lezhë.

Në seancën me dyer të mbyllura, Kovaçi deklaroi se ka qëlluar për të neutralizuar situatën, pasi kishte parë personat e armatosur. Megjithatë, gjykata pranoi kërkesën e prokurorisë dhe e akuzoi për veprën penale të shpërdorimit të detyrës.

Sipas hetimeve, viktima që mbeti e plagosur me armë zjarri ishte 30-vjeçari Sokol Daci, pronari i berberhanes, i qëlluar me 5 plumba. Por, sipas policisë, shënjestra e vërtetë nuk ishte pronari, por dy djem nga fisi Nikulaj, për shkak të një konflikti të vjetër midis Nikulajve dhe fisit Ndoka që daton nga 9 marsi 2025 në Shëngjin.

Personat e shpallur në kërkim janë:
• Gerardo Ndoka,
• Eliseo Ndoka,
• Kevin Ndoka, nipi i ish-deputetit Ndoka,
• dhe Merando Nikulaj, i dyshuari kryesor që dyshohet si shënjestra e atentatit.

Ngjarja lidhet me një konflikt të mëparshëm mes të rinjve të Nikulajve dhe fisit Ndoka, ku përplasja kishte përfshirë motorrët dhe sende të forta, si dhe një incident të papërfunduar ligjërisht.

Autorët kanë planifikuar vrasjen, por plani ka dështuar pasi në berberhane ndodhej Besart Kovaçi civil, i cili iu kundërpërgjigj me armë duke neutralizuar situatën.

Hetimet për ngjarjen vazhdojnë për të sqaruar të gjitha rrethanat dhe për të kapur personat e shpallur në kërkim.