Gazetari Artan Hoxha deklaroi se agjentët e Byrosë Kombëtare të Hetimit mund të shkojnë në zyrën e kryeministrit Edi Rama për të marrë deklarime në lidhje me ngjarjet e 21 Janarit, nëse kreu i qeverisë nuk paraqitet vetë në SPAK.

I ftuar në një emision televiziv, Hoxha tha se kaseta e dorëzuar në SPAK të hënën tregon se vrasjet e kryera atë ditë janë kryer me urdhër. “Kjo kasetë i është dhënë statusi i një prove shumë të rëndësishme, dhe po luhet me pjesën e burimit. Materiali ka rihapur çështjen dhe ka bërë që SPAK ta regjistrojë, edhe pse ende nuk ka persona të marrë nën hetim ose të pandehur,” u shpreh Hoxha.

Ai shtoi se deri tani shumë personazhe janë thirrur, por Rama nuk është pjesë e listës së dëshmuesve. “Sa më shumë kalon koha, aq më shumë shpresoj që do të marrë drejtim kjo çështje. Mendoj se kjo është hera e parë që Rama do të shkojë në SPAK për të dëshmuar, ose agjentët e BKH duhet t’i shkojnë në zyrë për të marrë deklarimin e tij,” përfundoi gazetari.