Kreu i Kadastrës, Artan Lame ka bërë një bilanc të procesit të rivlerësimit të pronave, ku u shprej entuziast në lidhje me procesin, që sipas tij kërkoi impenjimin e qindra punonjësve.

Në një deklaratë për mediat Lame pohoi se 113.800 pasuri morën shërbimin e rivlerësimin.

Sipas Lames, procesi i rivlerësimit solli 110 milionë dollarë të ardhura në Buxhetin e Shtetit.

“113.800 pasuri morën shërbimin e rivlerësimin, ndërkohë që në këtë proces presin 168.200 pasuri. Procesi i rivlerësimit është disi i komplikuar.

Disa persona u tërhoqën nga procesi pas rivlerësimit. Tirana në vend të parë për rivlerësimin e pasurive, mbi 47 mijë pasuri, ndërkohë Hasi është në vend të fundit me 35 rivlerësime. Procesi i rivlerësimit shërbeu si shkollë për qytetarët.

Nëpërmjet rivlerësimit, vlera e pronës rritet. Nga rivlerësimi ka përfitime ekonomike për qytetarët. Ndërkohë, 398 qytetarë nuk arritën të përfitojnë nga rivlerësimi.

Një falenderim për të gjithë punonjësit e Kadastrës që u përfshinë në këtë proces, ishte një çmenduri e vërtetë ngarkesa në zyrat tona në muajt e fundit. Do kërkoja ndjesë ndaj atyre qytetarëve, që diku u bë gabim, diku ju vonua procesi, është normale që kokëulur tju kërkojmë ndjesë qytetarëve”, tha Lame.