Ralph Lauren ka hedhur një hap të ri drejt inovacionit në botën e modës, duke prezantuar shërbimin e ri “Ask Ralph AI”. Platforma inteligjente, e zhvilluar në bashkëpunim me Microsoft Azure OpenAI, synon të transformojë përvojën e blerjeve online për klientët e markës prestigjioze.

Njëzet e pesë vjet pas debutimit të saj në tregtinë elektronike – ku u bë një nga markat e para luksoze që eksperimentoi me shitjet online – Ralph Lauren po shfrytëzon fuqinë e inteligjencës artificiale për të ofruar këshilla të personalizuara stili.

Klientët mund të përdorin aplikacionin “Ralph Lauren” për t’i bërë pyetje asistentit virtual, nga sugjerime të përgjithshme si “Çfarë duhet të vesh në një koncert?” deri tek pyetje më specifike për kombinime të veçanta të rrobave. Inteligjenca artificiale, e ndërtuar mbi arkivin e pasur të markës dhe filozofinë e stilistit Ralph Lauren, sugjeron veshje të cilat mund të blihen menjëherë online.

Sipas kompanisë, teknologjia është konceptuar për të ruajtur fokusin tek produkti, duke shmangur devijimet në tema jashtë mode dhe duke garantuar një përvojë të thjeshtë, funksionale dhe tregtare.

“Ask Ralph AI” u lançua më 10 shtator dhe aktualisht është i disponueshëm për përdoruesit e aplikacionit të Ralph Lauren në SHBA, duke shënuar një tjetër kapitull në ndërthurjen e modës me teknologjinë më të avancuar.