Një atentat mafioz është regjistruar në Como të Italisë, ku dy shqiptarë, Indrit Lleshaj (44) dhe Artan Lazari (42), kanë mbetur të plagosur. Sipas mediave italiane, ngjarja e rëndë ndodhi në orët e vona të së premtes, dhe autorët ishin të maskuar.

Shtetasit shqiptarë po udhëtonin me një makinë Audi Q5, e cila u bllokua nga një automjet tjetër i paidentifikuar. Pas ndalimit të marshimit, një motoçikletë me dy burra u afrua, të cilët thyen xhamin e përparmë të Audi-t. Kur Lleshaj dhe Lazari zbritën, ata u qëlluan me disa plumba, kryesisht në gjoks dhe në qafë.

Të dy shqiptarët mbetën të plagosur dhe janë dërguar në spital, ku njëri prej tyre raportohet në gjendje të rëndë shëndetësore. Autorët e ngjarjes, pas sulmit, janë larguar me motoçikletë dhe makinat e bllokuesve.

Autoritetet italiane kanë nisur hetimet, duke sekuestruar kamerat e sigurisë që kanë filmuar ngjarjen, për të identifikuar autorët dhe për të sqaruar rrethanat e atentatit. Lleshaj dhe Lazari janë emra të njohur për autoritetet e drejtësisë italiane.