Një ngjarje e rëndë kriminale është regjistruar në Dhërmi, ku recepsionisti i hotelit “Greccia,” Eraldo Nevruzi, 31 vjeç, banues në Tiranë, është zhdukur. Pas hetimeve, Policia e Vlorës thotë se dyshohet që Nevruzi është marrë peng dhe më pas është qëlluar me armë zjarri, rreth orës 00:30, nga Geraldo Shehu, 43 vjeç, lindur në Tepelenë dhe banues në Angli.

Trupi i Eraldo Nevruzit, i cili dyshohet se është vrarë nga i njohur i tij Geraldo Shehu, bashkëpronar i hotel ‘Greccia’ në Dhërmi, po kërkohet nga policia.31-vjeçari po kërkohet në zonën e Vunoit dhe në Dhërmi, ku mund të jetë hedhur.

43-vjeçari, është bashkëpronar i hotelit së bashku me vjehrrën e tij, Gentjana Nino. Dyshimet për ngjarjen lindën kur në hotel u gjetën gjurmë gjaku. Policia ka nisur hetimet, ndërsa ende nuk është gjetur trupi i Eraldo Nevruzit. Bëhet me dije se 31-vjeçari dhe autori kishin qenë shokë, pasi njiheshin si emigrantë në Angli dhe kohët e fundit kishin hapur biznes bashkë në Dhërmi, duke bashkëpunuar me hotelin.

Geraldo Shehu është arrestuar teksa po përpiqej të largohej nga vendi i ngjarjes në aeroportin e Greqisë. Policia dyshon se kemi të bëjmë me një vrasje, pasi nga dëshmitë janë dëgjuar dy të shtëna me armë zjarri dhe janë gjetur gjurmë gjaku. Pamjet filmike nuk janë të qarta në lidhje me largimin e 31-vjeçarit nga vendi i ngjarjes.

Policia ka shoqëruar 35 persona, përfshirë pjesëtarë të stafit të hotelit dhe persona të akomoduar në hotel, për të marrë dëshmi dhe për të ndihmuar në zbardhjen e ngjarjes. Hetimet vazhdojnë për të zbuluar motivet dhe rrethanat e plota të kësaj ngjarjeje të rëndë kriminale.