Detaje të reja nga zbardhja e vrasjes së Edmond Papës. I arrestuari Albano Velo dyshohet të jetë personi që ka marrë me makinë ekzekutorin, pak minuta pas vrasjes. Ai e priste me një mjet tip Audi A4, ndërkohë që vetë autori kryesor që hyri në lokal dhe zbrazi karikarorin e pistoletës mbi Edmond Papën ka mbërritur në afërsi të vendit të ngjarjes me makinë tip Smart.

Autori ka qenë tepër i njohur me zonën ku u ekzekutua Edmond Papa, ku në fakt makinën tip Smart e kishte parkuar shumë pranë lokalit ku u qëllua Papa, dhe nuk ka ngurruar që te shkojë disa ditë pas krimit për ta marrë makinën e tij.

Bashkëpunëtori i shoqëruar në Polici Albano Velo, djali i një Polici, u kap menjëherë sapo zbriti në aeroportin e Rinasit pasditen e 31 dhjetorit.

Personat e përfshirë në këtë vrasje dyshohet të kenë qenë vrasës me pagesë, ndërsa shkaku i vrasjes dyshohet të ketë qenë hakmarrja për vrasjen e Aleksandër Sadikajt. Ky i fundit dyshohet të jetë ekzekutuar pas një konflikti për çështje droge me Edmond Papën.