Avokati i policit të dhunuar dy ditë më parë në një lokal në Vlorë ka reaguar ashpër ndaj mosveprimit të Policisë së Shtetit, duke publikuar pamje të reja që sipas tij tregojnë qartë momentin e rrahjes brutale të klientit të tij.

Në postimin e bërë në rrjetet sociale, ai shkruan:

“Meqë policia e shtetit nuk arriti të administronte pamjet filmike për të zbardhur ngjarjen e ndodhur në ambientet e një lokali në Vlorë, ku u dhunua një punonjës shumë i nderuar i policisë shtetit, atëherë po i vendos unë momentet e dhunës. Në video dallohen qartë personat që kanë dhunuar policinë, që në fakt nuk kanë qenë as dy as tre por 15 persona me mjete të forta. Qytetarët janë bërë pre e një videoje të shkurtër të publikuar në media ku dallohet një goditje me shpullë nga një kamerier, por është fshehur qëllimisht pjesa tjetër e ngjarjes.”

Sipas tij, pamjet që ai ka siguruar janë “tronditëse” dhe identifikojnë qartë autorët e dhunës.

“Prandaj policia e shtetit duhet të ndërhyjë me ndalimin e dhunuesve dhe të zbardhë dinamikën e ngjarjes. Kjo histori nuk do përfundojë këtu. Dhunuesit e policit që është në reanimacionin e spitalit të Vlorës do të përgjigjen ligjërisht, edhe pse janë miqtë e Kryeministrit dhe pushtetit të tij,” përfundon avokati.

Efektivi i dhunuar ndodhet ende në gjendje të rëndë shëndetësore në spitalin e Vlorës. Ndërkohë, Policia e Shtetit ende nuk ka dhënë një version zyrtar për ngjarjen.

Deri tani nuk dihet nëse pamjet e publikuara do të përdoren nga hetuesit për identifikimin e autorëve.