Dy persona ende të paidentifikuar kanë dhunuar avokatin Sokol Mëngjesin, njohur edhe si një nga avokatët e ish kryeministrit Sali Berisha. Kjo ngjarje u diskutua në mbledhjen e sotme të Komisionit për Çështjet Ligjore, Administratën Publike dhe të Drejtat e Njeriut.

Deputeti i PD-së, Asllan Dogjani, kërkoi arrestimin e autorëve sa më parë, duke e dënuar ngjarjen në mbledhjen e komisionit. Kryetarja e Komisionit, Klotilda Bushka, gjithashtu dënoi aktin e dhunës dhe u shpreh se organet e rendit po punojnë për zbardhjen e saj.

“Një avokat është goditur me levë në mes të bllokut ditëne sotme dhe kjo tregon se bandat dhe krimi nuk ka frikë nga ligji dhe se qytetarët janë të pasigurte në këtë vend. E dënoj këtë dhunë të ushtruar ndaj avokatit dhe i kërkoj organeve ligjzbatuese që personat përgjegjës të vihen para përgjegjësisë penale”, tha Asllan Dogjani.

Ndërkohë, Bushka shtoi: “Dënojmë aktin e dhunës. Thirrje organeve të nxjerrin para përgjegjësisë fajtorët, pa dalë ne në konkluzione. Jam e bindur që organet e drejtësisë po punojnë për të zbardhur të vërtetën. Uroj që zoti Mëngjesi të rikuperohet.”