Reperi i njohur me origjinë nga Kosova, Azet, ka sqaruar publikisht situatën pas raportimeve të mediave gjermane, sipas të cilave një pajisje shpërthyese kishte shpërthyer mbrëmjen e së mërkurës në hyrje të një pallati në Düsseldorf, pronë që rezulton të jetë e tij.

Ngjarja ngriti shqetësime te fansat dhe publiku, duke u raportuar si e dyshimtë. Megjithatë, Azet ka vendosur t’i japë fund spekulimeve përmes një deklarate në Instagram, ku theksoi se nuk ka qenë objektiv i ndonjë atentati:

“Nuk ka pasur asnjë atentat ndaj meje. Unë kam disa prona, përkatësisht banesa kolektive. I prekur ka qenë një nga këto objekte – unë vetë nuk banoj aty. Ngjarja nuk ka lidhje me mua,” tha reperi.

Ai gjithashtu sqaroi se apartamenti ku ndodhi shpërthimi është vetëm një nga pronat e tij dhe se aktualisht autoritetet gjermane po hetojnë rrethanat e incidentit, pa asnjë raportim për të lënduar.