Fatmir Mataj, babai i Ramazan Matajt, i cili humbi jetën më 5 janar në një atentat, ka reaguar pas ngjarjes, duke theksuar se djali i tij nuk ka pasur lidhje me aktivitete të paligjshme. Në një intervistë  ai u shpreh se atentati ndaj djalit të tij është një ngjarje e rëndë dhe se ai nuk ka dyshime për shkakun e kësaj ngjarjeje.

Fatmir Mataj u shpreh se, nëse ky atentat nuk zbardhet nga autoritetet, ai do të kërkojë vetë drejtësinë për djalin e tij, duke shtuar se është një person që nuk ka lidhje me krime dhe se ata janë një familje që punon vetëm me mundin e saj.

Ai tha: “Mos abuzoni. Nuk jemi ne njerëz që merremi me punë të pista. Nuk kemi lidhje me asnjë, vetëm punë shtëpi, shtëpi punë. Mos krijoni viktima më shumë, ta mbyllim programin më keq, nëse nuk del do e kërkoj vetë, nuk do shkojë gjatë.”

Ai theksoi se nuk ka dyshim për asgjë lidhur me ngjarjen dhe se, nëse do të kishte dyshime, do të kishte vepruar menjëherë pas ngjarjes. “Ka qenë i papërgatitur,” shtoi ai, duke shpjeguar se ka marrë informacion rreth ngjarjes në orën 8:20 dhe ka shëtitur kudo për të kërkuar informacione.