Babai i djalit të plagosur rëndë në konfliktin tragjik pranë shkollës “Fan Noli” në Tiranë, ku humbi jetën 14-vjeçari Martin Ç., ka folur në një studio televizive për situatën e rëndë shëndetësore të të birit dhe mbi atë që i ka treguar djali për sherrin fatal.

Një miqësi e ngushtë mes dy djemve
Duke ndarë detaje për marrëdhënien mes fëmijëve, babai tha:

“Ne jemi komshinj me Martinin dhe fëmijët njiheshin që të vegjël. Ishin të pandarë, si vëllezër. I merrja unë të dy gjithmonë për në stërvitje. Përveç sportit, ata merreshin dhe me not. Ishin gjithnjë bashkë.”

Ai tregoi se Luisi, i biri i tij, është përfshirë në ngjarje pasi Martini e kishte thirrur për ndihmë.
“Kam folur me Luisin për ngjarjen. Ai mban mend vetëm pjesën e konfliktit. Ka shkuar atje sepse Martini i kishte thënë që e kishte goditur një person i madh në moshë.”

Gjendja shëndetësore e rënduar e djalit
Luisi po përballet me pasoja të rënda nga plagosja. Babai i tij shpjegoi:

“Nuk është më mirë, por ka dalë nga reanimacioni. Megjithatë, është akoma në stres dhe panik. Plagët janë shumë të thella. Krahun e majtë pothuajse e ka të paralizuar. I kujtohet çdo gjë dhe është në një gjendje të rënduar psikologjike.”

Babai theksoi se djali po merr trajtim privat për fizioterapi, pasi spitali nuk ka ofruar as fizioterapist as psikolog për t’i ndihmuar.
“Thika i ka prekur edhe mëlçinë. Djali është ende i intubuar, dhe mjekët kanë thënë se nuk do të ketë një ndërhyrje të dytë derisa të shohim përmirësime.”

Duke përshkruar pasojat fizike dhe emocionet e rënda të ngjarjes, babai shtoi:
“Për momentin, po e mbajmë këtu, por po e mendojmë ta çojmë jashtë vendit. Nuk e di se sa kohë do të duhet që, me pesë plagë në trup, të bëhet ai që ka qenë.”

Ky rast tragjik ka lënë pasoja të mëdha te të dyja familjet, ndërsa komuniteti dhe autoritetet vazhdojnë të përpiqen për të kuptuar dhe adresuar arsyet e kësaj fatkeqësie.