Detaje të reja kanë dalë në dritë lidhur me vrasjen e rëndë që ndodhi mëngjesin e sotëm (9 Tetor 2024) në provincën e Caserta-s, Itali, ku një shqiptar vrau gruan e tij në sy të fëmijëve të mitur, në gjendje të rënduar psikologjike. Viktima, Eleonora Toci, një 24-vjeçare shqiptare, u vra nga burri i saj, Lulzim Toci, 30 vjeç, punëtor bujqësie.

Eleonora ndodhej në Itali vetëm prej një muaji, pasi ishte bashkuar me bashkëshortin dhe fëmijët e tyre për të jetuar në një shtëpi të re, të marrë me qira në “Via Caravaggio”, San Felice a Cancello. Në këtë shtëpi ndodhi edhe tragjedia e rëndë. Sipas hetimeve paraprake, Lulzimi shtrëngoi fort qafën e gruas së tij në dhomën e gjumit, gjatë një konflikti. Edhe pse Eleonora u përpoq të mbrohej, nuk arriti të shpëtonte.

Policia dyshon se krimi ka ndodhur ndërsa viktima mund të ketë qenë duke fjetur, pasi fqinjët nuk kanë dëgjuar zhurma apo britma që të sinjalizonin një përleshje. Kjo hipotezë mbetet ende për t’u konfirmuar nga hetimet e mëtejshme.

Pas kryerjes së krimit, Lulzimi doli nga shtëpia dhe shkoi te kunata e tij, duke i kërkuar ndihmë. Kur ajo, e dyshimtë për atë që kishte ndodhur, bëri një videothirrje në telefonin e Eleonorës, një nga fëmijët e përgjigj dhe konfirmoi se “babi vrau mamin”. E tmerruar, kunata lajmëroi menjëherë policinë, e cila mbërriti në vendngjarje dhe gjeti trupin e pajetë të 24-vjeçares.

Karabinierët arrestuan Lulzim Tocin, i cili u gjet në një gjendje të rënduar psikologjike dhe të çorientuar. Autoritetet po vijojnë hetimet për të përcaktuar motivet e sakta të këtij akti të tmerrshëm.