A ju duket e pabesueshme? Po, është sërish Balenciaga – marka e njohur për produktet e saj të çuditshme, provokuese dhe shpesh të kritikuara për çmimet stratosferike. Këtë herë, objekti që po bën xhiron e internetit nuk është një peshqir i transformuar në fund, por një çantë e dizajnuar identikisht si një qese mbeturinash.

I quajtur “Trash Pouch”, aksesorja vjen nga koleksioni Fall/Winter 2022 nën drejtimin kreativ të Demna Gvasalia, dizajneri që ka ndërtuar reputacionin e tij mbi ironinë, provokimin dhe përmbysjen e rregullave të modës. Objekt diskutimesh në çdo pasarelë që prek, Demna ka vendosur ta ndajë botën sërish në dy: ata që e quajnë art… dhe ata që e quajnë absurditet.

Ndryshe nga një qese e zakonshme mbeturinash, kjo e Balenciaga-s është realizuar me lëkurë viçi (calfskin leather), që i jep shkëlqim, strukturë dhe një “touch” luksoz. Çanta vjen në disa ngjyra – të zezë, të verdhë, të bardhë dhe blu – dhe mbyllet me tërheqje nga lart, njësoj si qeset e plehrave, vetëm se kjo hera ka tagun “high fashion”.

Por çfarë ndezi debatet?
Çmimi i lançimit: 1,790 dollarë.

Reagimet online shpërthyen menjëherë: shumë e panë si provokim të panevojshëm, të tjerë si ironi ndaj kulturës së konsumit, ndërsa kritikat për çmimet “overpriced” të markës nuk munguan. Megjithatë – dhe kjo është ironia – produkti u shit me shpejtësi, duke u kthyer në një objekt të kërkuar për koleksionistët dhe fansat e “hype fashion”.

“Trash Pouch” konsiderohet pjesë e fenomenit të njohur si “trash couture”, një rrymë e modës që sfidon idenë tradicionale të luksit dhe bukurisë, duke e kthyer të zakonshmen, të përditshmen – madje dhe të ‘shëmtuarën’ – në objekt arti.

Po ju, çfarë mendimi keni?
Art provokues apo thjesht një absurditet i shtrenjtë i modës moderne?