Kreu i Grupit Parlamentar të Partisë Socialiste, Taulant Balla, ka reaguar pasi Gjykata Kushtetuese pranoi kërkesën e deputetëve të opozitës dhe shfuqizoi rregulloren e re të Kuvendit për shtimin e komisioneve të përhershme.

Përmes një postimi në Facebook, Balla shprehet se nuk gjen asnjë lidhje mes të drejtës së Kuvendit për organizimin e punës së tij dhe vendimit të dhënë nga Gjykata Kushtetuese.

“Nuk gjej dot asnjë lidhje mes të drejtës së Kuvendit për organizimin e punës së vet në komisione të përhershme dhe vendimit të sotëm të Gjykatës Kushtetuese. Pres me shumë kuriozitet vendimin e plotë për të kuptuar edhe atë çështjen e ‘të drejtës së shprehjes’, kur është fakt se deputetët kanë votuar dhe e kanë shprehur vullnetin qartazi me votë,” shkruan Balla.

Ai shton se, pavarësisht vendimit, Kuvendi duhet të vijojë punën me ndarjen aktuale të komisioneve, të cilat sipas tij do të rimiratohen bashkë me ndryshime të tjera që pritet të depozitohen në ditët në vijim.