Bangladeshi është përfshirë nga protesta të ashpra, pas vdekjes tragjike të një vajze tetëvjeçare, e cila u përdhunua ndërsa ndodhej për vizitë në shtëpinë e motrës së saj më të madhe në qytetin Magura.

Sipas një padie të ngritur nga nëna e saj, ngjarja ka ndodhur në mesnatën e 5 marsit dhe mëngjesin e nesërm. Pas disa ditësh në gjendje kritike, vajza humbi jetën në një spital në kryeqytetin Dhaka, pasi pësoi tre arreste kardiake.

Trupi i saj u transportua në Magura me një helikopter të ushtrisë, por zbarkimi në stadiumin lokal u shoqërua me protesta masive nga qytetarët e revoltuar.

Autoritetet kanë arrestuar burrin 18-vjeçar të motrës së saj, prindërit e tij dhe vëllain e tij, ndërsa gjyqi për këtë rast pritet të nisë brenda shtatë ditëve të ardhshme.

Ngjarja ka shkaktuar zemërim dhe indinjatë të gjerë, me qytetarë dhe aktivistë që kërkojnë dënime të ashpra për përgjegjësit dhe masa më të forta kundër dhunës ndaj grave dhe fëmijëve.