Banorët e lagjes “5 maj” dhe të njësisë nr.8 në Tiranë kanë bërë kallëzim në SPAK ditën e sotme për sekuestro preventive mbi projektin.

Këta banorë janë prej muajsh tashmë në protesta kundër shembjes së shtëpive të tyre, në kuadër të projektit të rindërtimit nga Bashkia e Tiranës.

Ata kanë shprehur vazhdimisht se nuk janë kundër zhvillimit të zonës por kërkojnë transparencë nga përfaqësues të bashkisë dhe kontratë të ligjshme që u garanton marrjen e një banese të re, me vend dhe datë të përcaktuar.

Një gjë e tillë nuk ka ndodhur ende, ndërsa Bashkia u ka vënë në dispozicion një kontratë që banorët e quajnë “paçavure” pasi sipas tyre është premtim se në një të ardhme të afërt do tu jepet një shtëpi, pa dhënë asnjë detaj mbi mënyrën, zonën apo kohën e saktë.

Në një deklaratë për mediat sot ata shprehen se edhe takimi dje me kryeministrin Rama nuk ndryshoi asgjë, dhe se asnjë nga kërkesat e tyre nuk u mor për bazë.

Liza Marku (banore e ‘5 majit) u shpreh e gatshme që të rindërtonte gjysmën e shtëpisë së shembur nga e para, nëse bashkia nuk do e pengonte.

Të tjerë banorë u shprehën të bindur se do vijojnë më protestën dhe kallëzimin e tyre për të marrë atë që u takon me ligj.

Prononcimet për median:

Liza Marku: Asnjë lloj kontratë nuk kam, dje nuk arritëm asgjë. E kam bërë me mundin tim, edhe po të ma lënë ashtu në gjysëm e ndërtoj vetë prape.

Të më lejë në terezinë time!

-A keni firmosur ndonjë shkresë me bashkinë?

Liza Marku: Jo absolutisht!

Banore tjetër: Nuk ishte vendim prishja, vetëm njoftim! Kanë firmosur vetëm 5 % e banorëve marrëveshjen, jua jap dhe personat me emër dhe mbiemër se gënjejnë.Ne na bashkon një problem, ne pjesa më e madhe i kemi të legalizuar dhe disa në process legalizimi që prapë sipas ligjit na bën pronarë.

-Si u soll policia me ju?
Liza Marku: Ma keq s’ka, nuk më lanë as të mar ilacet, zvarrë më kanë nxjerrë.