Për të disatën herë banorët e Lumasit  në Kuçovë ngrihen në protestë për të mbajtur të paprekur burimin e ujit të Sinecit. Banorët e fshatit Lumas janë konfrontuar me policinë pasi kundërshtojnë projektin në burimin e Sinecit.

Sipas tyre projekti është bërë pa u konsultuar me banorët dhe është shpallur edhe firma fituese, e cila ka filluar edhe punimet.

Banorët janë kundër shfrytëzimit të ujit të burimit për një ujësjellës të bashkisë.

Banorët e Lumasit kanë bllokuar punën e mjeteve të firmës, duke bërë që të pezullohet puna dhe të ketë përplasje me policinë, ku një prej banorëve është lënduar rëndë dhe nisur për në spital.

Banorët kanë bllokuar që prej orëve të para të mëngjesit rrugën e fshatit, duke deklaruar se nuk do të lëvizin deri në marrjen e një përgjigje të plotë.

Po ashtu ata pretendojnë se burimi përdoret prej shekujsh për vaditjen e tokave dhe për kafshët dhe nuk do të lejojnë vijimin e projektit.

Mësohet se banorët kanë hartuar një peticion dhe do të hedhin në gjyq bashkinë e Kuçovës.