Në një deklaratë të fortë nga foltorja e Kuvendit, deputeti Gazment Bardhi akuzoi kryetaren e Kuvendit për mashtrim dhe mungesë respekti ndaj institucioneve shtetërore. Sipas Bardhit, seanca plenare e së enjtes duhej të ishte zhvilluar sipas kalendarit të miratuar nga vetë Kuvendi, por u anulua me arsyetimin se kryetarja kishte një “angazhim të rëndësishëm në Ukrainë”.

“Juve na thatë se kishit një angazhim shumë të rëndësishëm në Ukrainë. E vërteta është se nuk ishit në Ukrainë por ishit duke ngrënë drekë në Greqi, madje këtë na e bënit me dije të gjithë deputetëve”, tha Bardhi.

Ai e cilësoi këtë veprim si shkelje të rregullores dhe një formë arrogante të trajtimit të Kuvendit si “shtëpi personale”.

“Është një arrogancë që kalon kufijtë e sjelljes suaj të përditshme dhe normale”, theksoi Bardhi, duke kërkuar llogari dhe transparencë për mungesën e papritur në një seancë të planifikuar.

Deklarata pritet të ndezë përplasjet politike në ditët në vijim, ndërsa ende nuk ka një reagim zyrtar nga kryetarja e Kuvendit për akuzat.