Deputeti i Partisë Demokratike, Gazment Bardhi, mori fjalën në Kuvend pas kryetares Elisa Spiropali, ku ai ngriti akuza për mënyrën sesi është ndryshuar ligji për Gardën e Republikës. Sipas Bardhit, ndryshimet e bëra në ligjin për zgjedhjen e drejtorit të Gardës nuk ishin të bazuara në interesin publik, por në interesin personal të një individi të caktuar.

Bardhi kujtoi se më 10 shtator 2024, Ministri i Brendshëm njoftoi përzgjedhjen e drejtorit të Gardës përmes një gare, por në fakt, sipas tij, gjithçka kishte qenë e planifikuar që nga marsi i vitit 2023. “Në mars 2023, kur miratonit ndryshimet për Gardën e Republikës, ju thashë që ishte një investim për të zgjedhur një njeri që vjen nga jashtë sistemit,” tha Bardhi. Ai shtoi se gjashtë muaj më vonë u emërua personi për të cilin u ndryshua ligji, duke e cilësuar këtë veprim si një akt korruptiv.

“Ligjet me porosi janë kthyer në normalitet për këtë mazhorancë,” tha Bardhi, duke kërkuar ngritjen e një komisioni etike për të vërtetuar mënyrën se si u sponsorizua ky ligj.