Lulzim Basha, i cili po përpiqet të mbijetojë politikisht pas zgjedhjeve të 11 majit, ka shpallur një strategji të re për të siguruar mbështetje për Koalicionin Euro-Atlantik. Në një deklaratë për mediat, Basha zbuloi se ka në dispozicion një databazë me 480 mijë numra telefoni të mbështetësve potencialë, të cilëve do t’u telefonojë personalisht për të kërkuar votën.

Sipas Bashës, kjo formë kontakti nuk është sondazh, por “një komunikim i drejtpërdrejtë me qytetarët”, që sipas tij reflekton një përkrahje reale në terren. Në Qarkun e Tiranës, ai tha se nga 30 mijë numra të kontaktuar, 30% janë shprehur pro Koalicionit Euroatlantik, 48% kundër dhe 22% janë të pavendosur.

Ai shtoi gjithashtu se një nga treguesit e mbështetjes që ndjen në publik është përshëndetja që merr në rrugë me batutën “O Ramë, ku i ke shokët?”, një frazë që sipas tij ka marrë jetë si refren popullor ndaj korrupsionit të qeverisë Rama.

I pyetur nëse videot ironike ndaj kryeministrit janë mënyra e tij për të hyrë në lojën politike, Basha u përgjigj se nuk i druhet përballjes dhe se, pavarësisht humbjeve të kaluara, ai vazhdon të luftojë.