Kandidati i Partisë Demokratike për deputet në Tiranë, Belind Këlliçi, ka bërë një denoncim publik ndaj Bashkisë së Tiranës për atë që ai e cilëson si “asfalt elektoral” në rrugën “Shyqyri Peza”, në Njësinë nr.4.

Në një video të postuar në rrjetet sociale, Këlliçi e cilëson këtë veprim si një krim zgjedhor të përsëritur, duke akuzuar qeverinë dhe bashkinë se shtrimi i rrugëve bëhet vetëm në prag të zgjedhjeve dhe asfalti i hedhur nuk zgjat më shumë se tre muaj.

“Ora është 23:12! Shkoni tani, kapini në flagrancë ata që kanë 10 vite që tallen me banorët e Tiranës çdo palë zgjedhje, duke u shtruar rrugë me asfalt që nuk mban as 3 muaj! Ky është krim zgjedhor i përsëritur në çdo dy vite dhe askujt nuk i hyn gjembi në këmbë! Të na rrojë Task Forca!”, shprehet Këlliçi.

Ai i bën thirrje Task Forcës së SPAK për zgjedhjet, duke kërkuar ndërhyrje për të ndalur praktikat e tilla që, sipas tij, përdoren si mjet manipulimi për vota në zgjedhje.