Protesta e studentëve në Beograd vijon me intensitet, ku mbi 100 mijë protestues janë mbledhur në qendër të qytetit për të kërkuar ndryshime politike dhe liri më të madhe.

Pamjet nga kryeqyteti serb tregojnë një det me drita të ndezura nga telefonat e protestuesve, ndërsa në disa zona janë përdorur edhe flakadanë për të krijuar një atmosferë edhe më të fortë simbolike.

Sipas vlerësimeve të Ministrisë së Punëve të Brendshme, në protestë janë të pranishëm rreth 107 mijë persona, por organizatorët pretendojnë se numri është edhe më i madh.

Protesta e titulluar “15 në 15 – Ju Presim” nisi zyrtarisht në orën 16:00. Studentët mbajtën fjalime në sheshin Slavija, ndërsa rrugët qendrore deri te ndërtesa e Kuvendit të Serbisë u mbushën me protestues.

Gjatë një prej fjalimeve, një grua tentoi të ndërhynte në skenë për t’i marrë mikrofonin njërës prej studenteve, por ajo vijoi mesazhin e saj duke deklaruar me forcë:
“S’do të lejojmë më që të na privoni lirinë tonë.”