Kryedemokrati Sali Berisha ka publikuar një denoncim të një qytetari dixhital në Facebook, sipas të cilit kazinoja “Queens Casino” në Montreal, Kanada, është në pronësi të Luftar Hysës dhe Dritan Rexhepit, i njohur si një nga trafikantët kryesorë të drogës nga Ekuadori drejt Evropës.

Në postimin e qytetarit thuhet:

“Doktor, një informacion i sigurt që kam nga miqtë e mi: ‘Queens Casino’ në pronësi të Luftar Hysës është bashkëaksioner me narkotrafikantin Dritan Rexhepin.”

Berisha komentoi për mediat se vendimi i SHBA-së për të sanksionuar familjen Hysa dhe bizneset e tij si pjesë e një organizate terroriste është ekspozimi i “narkoshtetit” të ngritur nga kryeministri Edi Rama.

Lideri i opozitës akuzoi gjithashtu Ramën se i ka bërë avokatinë Hysës, duke e shpallur investitor strategjik në Shqipëri dhe duke i hapur rrugën për pastrimin e parave të trafikut të drogës. Berisha e përshkroi Hysën si mikun e preferuar të Ramës, të lidhur me kartelin meksikan të Sinaloas dhe me figura të larta të qeverisë shqiptare.

Deklaratat e Berishës vijnë në një moment tensioni të madh politik dhe kanë nxitur reagime të forta në rrjetet sociale dhe mediat shqiptare.