Kryedemokrati Sali Berisha nuk u paraqit sot në orën 10:00 në Prokurorinë e Posaçme (SPAK), ku ishte thirrur për t’u pyetur mbi ngjarjet e 21 janarit 2011, protestë e dhunshme përpara Kryeministrisë që la disa viktima.
Berisha deklaroi për median se thirrja ndaj tij “nuk është bërë sipas ligjit”, duke theksuar refuzimin e tij për t’u paraqitur.
Ndërkohë, SPAK publikoi për herë të parë të gjithë procedurën e thirrjes, duke sqaruar se Berisha ishte dërguar dy fletëthirrje në disa adresa:
• E para, më datë 3 nëntor 2025, në banesën e tij, për t’u paraqitur më 7 nëntor 2025, e cila u kthye mbrapsht me shënimin se “rojet janë autorizuar të mos marrin asnjë zarf”.
• E dyta, më datë 7 nëntor 2025, u dërgua në tre destinacione: banesë, Partia Demokratike dhe Kuvend, për t’u paraqitur më 14 nëntor 2025. Kjo fletëthirrje gjithashtu u refuzua, përfshirë edhe dorëzimin përmes stafit politik të PD-së në Kuvend.
Prokuroria sqaron se njoftimi për thirrjen i është dërguar gjithashtu edhe në emailin zyrtar të Berishës, [email protected], më datë 10 nëntor 2025.
Ngjarjet për të cilat Berisha është thirrur lidhen me protestën e 21 janarit 2011, kur para Kryeministrisë zhvillohej një tubim i dhunshëm që shkaktoi vdekje dhe plagosje të qytetarëve.
SPAK thekson se procedura është kryer në përputhje me ligjin, duke dokumentuar çdo hap të dërgimit të fletëthirrjeve, ndërsa Berisha ka zgjedhur të mos paraqitet.
