Kreu i Partisë Demokratike, Sali Berisha, gjatë një konference për mediat në selinë blu, deklaroi se në dosjen që ai e cilësoi si “dosja Balluku”, nga 6500 mesazhe të administruara, 3800 sipas tij i përkasin kryeministrit Edi Rama.

Berisha pretendoi se kjo, sipas tij, dëshmon përfshirjen direkte të kreut të qeverisë, duke e cilësuar Ballukun si “shërbëtore” të Ramës dhe kryeministrin si “kokën” e korrupsionit. Ai shtoi se ndër dosjet që i konsideron më të rënda është ajo e AKSHI-t.

Gjatë fjalës së tij, Berisha akuzoi gjithashtu kryeministrin për favorizim me tenderë të kompanisë 2T, duke pretenduar se janë dhënë dhjetëra kontrata publike.

“Me dosjen AKSHI Edi Rama plaçkiti nëpërmjet baxhanakut, dosjen me qindra miliona euro. Bashkë me Mirlindën e AKSHI-t plaçkitën të dhënat e të gjithë shqiptarëve. Morën peng, emëruan dhe shkarkuan ministra në përputhje me interesat kriminale, Rama -Agasi. Edi Rama duhet të japë dorëheqjen. Lubinë po e mbron për të hequr imunitetin për të mos e shkarkuar, dhe këto janë përpjekje për të mbrojtur veten. Kur Kushtetuta parashikon pezullim nga detyra”, tha ai.

Deri më tani nuk ka pasur një reagim zyrtar nga kryeministri Edi Rama apo përfaqësues të qeverisë lidhur me deklaratat e bëra nga kreu i opozitës.