Kryetari i Partisë Demokratike, Sali Berisha, gjatë një prononcimi për mediat në Podgoricë, foli për fokusin e takimit me Partitë Popullore Evropiane (EPP), duke theksuar se procesi i integrimit të Shqipërisë dhe Ballkanit Perëndimor është ngadalësuar kryesisht për arsye të brendshme.

“Narkoshteti në Shqipëri është pengesa kryesore e integrimit të Shqipërisë në BE,” u shpreh Berisha, duke shtuar se Shqipëria, si i vetmi narkoshtet në Europë, duhet të njihet më gjerësisht si e tillë nga elitat politike të qendrës së djathtë evropiane.

Lidhur me qëndrimin e presidentit të EPP-së, Manfred Weber, Berisha theksoi se ishte i vetmi opozitar në panel dhe se diskutimi i tij u prit me interes dhe komente pozitive. Ai theksoi se “mosrespektimi i standardeve demokratike, penetrimi i krimit në qeverisje dhe terrori politik për të marrë vota” janë faktorët kryesorë që pengojnë integrimin e Shqipërisë.

I pyetur për rikthimin e tij në skenën politike dhe në takimet e EPP-së pas një kohe të gjatë, Berisha e cilësoi atë si “rikthim epik”, duke theksuar se njohuritë mbi Shqipërinë në qarqet ndërkombëtare kanë ndryshuar dhe se “Edi Rama nuk do të mund të manipulojë opinionet siç ka bërë deri tani.”