Tiranë – Disa kandidatë të Partisë Demokratike në zgjedhjet e fundit kanë dorëzuar ankimime në Komisionin Qendror të Zgjedhjeve (KQZ) dhe Komisionin e Ankimimeve dhe Sanksioneve (KAS), ku kërkojnë rinumërim të votave preferenciale, duke ngritur shqetësime për tjetërsim të mundshëm të tyre. Por, kërkesat janë hasur me pengesa ligjore, pasi për t’u shqyrtuar duhen shoqëruar edhe me miratimin zyrtar të partisë.

Në këtë kontekst, një mesazh i brendshëm i publikuar nga mediat, i dërguar nga ish-kryeministri dhe lideri i PD-së, Sali Berisha, drejtuar strukturave të partisë, konfirmon mbështetjen zyrtare të PD-së për çdo kandidat që kërkon transparencë në proces.

“Çdo kandidat/e për deputet të koalicionit PD-ASHM, që për efekte ligjore i nevojitet mbështetja e partisë për çdo kërkesë që paraqet – kamera, verifikime, rinumërime, etj – do të mbështetet pa asnjë hezitim nga partia! Ju rikujtoj se transparenca e plotë është standard i PD-së dhe koalicionit tonë!”, shkruan Berisha në mesazhin e shpërndarë në WhatsApp.

Ky reagim vjen pas raportimeve për pakënaqësi brenda partisë lidhur me mënyrën e numërimit dhe renditjes së kandidatëve, në një proces që për herë të parë aplikoi listat e hapura në mënyrë të plotë.

Partia Demokratike konfirmon se do të qëndrojë në krah të çdo kandidati që kërkon verifikime, duke theksuar se standardet e transparencës janë thelbësore për forcimin e besimit tek zgjedhjet dhe tek procesi demokratik.