Kreu i Partisë Demokratike, Sali Berisha, në një dalje për mediat u pyet lidhur me çështjen e imunitetit të zv/kryeministres Belinda Balluku.

Berisha deklaroi se, sipas tij, mesazhet nga zyrtarët evropianë kanë qenë të qarta që drejtësia të mos pengohet në ushtrimin e detyrës së saj. Ai përmendi qëndrime të Bashkimit Europian, Komisionit Europian dhe Parlamentit Europian, duke theksuar se nuk duhet të ketë asnjë pengesë për hetimet.

Në fjalën e tij, Berisha përdori tone të ashpra ndaj qeverisë dhe kryeministrit, duke pretenduar se çdo ndërhyrje për të mos lejuar heqjen e imunitetit do të ndikonte negativisht në procesin e integrimit europian të vendit.

I pyetur edhe për mbledhjen e grupit parlamentar të Partisë Socialiste, të njoftuar për t’u zhvilluar të enjten, Berisha u shpreh se, sipas tij, vendimmarrja për çështjen e mandateve dhe imunitetit nuk i takon grupit parlamentar, por Këshillit të Mandateve. Ai akuzoi shumicën se ka vepruar në kundërshtim me Kushtetutën dhe se nuk ka lejuar një proces të rregullt votimi në këtë organ.

Deri tani nuk ka pasur një reagim zyrtar nga përfaqësuesit e Partisë Socialiste lidhur me deklaratat e kreut të opozitës.